政Whats噏：日排核污水　張欣宇話港危中有機

日本喺上周四將核污水排海，港府即時禁止日本10個縣水產進口，本港食肆憂水產品嘅主要來源斷供而造成沉重打擊，但議員張欣宇就話危中有機，或者係香港能夠抓住嘅一個新機遇，為經濟帶嚟一個新嘅增長點喎。

邊啲人有機？講嘅係本土水產養殖場呀！張欣宇日前喺社交平台貼文，話好多人可能以為香港養魚業已經步入式微，但佢早前參觀過喺西貢榕樹澳經營嘅一間自家魚排本土養殖場，嗰度係通過採用創新技術改良飼料水質，又堅持人手餵飼，終於搵到適合香港環境嘅配方同體系，唔單止養殖嘅產品肉質鮮嫩，零藥物殘餘，更加喺產量上得到極大突破，小小嘅魚排能夠年產數以10萬計嘅鮮魚。佢仲話近日養殖場自主研發嘅臭氧機，更攞到「日內瓦國際發明展」金獎添！